Vetëvendosje: “Zajednica” ka rënë – Qeveria të largohet

0

Lëvizja Vetëvendosje  ka ripërsëritur kërkesën për largimin e Qeverisë. E ka bërë këtë sot në një konferencë për media.

“Lëvizja VETËVENDOSJE! mbajti sot konferencë për media ku u fol për e marrëveshjen antikushtetuese të nënshkruar nga Qeveria e Kosovës, “Zajednicën”. Nënkryetari i VETËVENDOSJE!-s, Driton Çaushi, tha se gjatë këtyre katër muajve, Qeveria policore e Kosovës përdori një dhunë të paparë për të shtypur protestën tonë brenda dhe jashtë parlamentit, me arrestime të deputetëve dhe aktivistëve, thyerje të zyrave të Lëvizja VETËVENDOSJE! e përndjekje të qytetarëve.

“Qeveria gjatë këtyre katër muajve krijoi një kaos, për shkak të kokëfortësisë dhe arrogancës së kësaj qeverie për të mos u tërhequr nga këto marrëveshje. Sot jemi 3 ditë nga një vendim i Gjykatës Kushtetuese i cili hodhi poshtë “Zajednicën” duke gjetur shkelje të Kushtetutës në mbi 20 nene të marrëveshjes. Edhe pse kjo gjykatë vazhdon të mbetet e ndikuar nga Qeveria e Kosovës, ajo, nën presionin e protestës së opozitës dhe qytetarëve, mori një vendim që e bëri të qartë veprimin antikushtetues të Isa Mustafës me 25 gusht në Bruksel”, tha Çaushi. Ai theksoi se ky vendim, edhe pse i pamjaftueshëm, në shtjellimin e lëndës dhe konkluzionet rrëzon edhe marrëveshjen e 19 prillit 2013, për shkak të neneve të shkelur të Kushtetutës si ai për Barazi para ligjit dhe Kapitullin mbi të drejtat e minoriteteve dhe pjesëtarëve të tyre.

“Edhe pas këtij vendimi të Gjykatës Kushtetuese, Qeveria Mustafa – Thaçi  vazhdon të shtiret gjoja se vendi i është kthyer normalitetit. Ata bile shkojnë edhe më tej, duke sugjeruar përpilimin e dekretit dhe statutit të “Zajednicës”. Ne sot i rikujtojmë kësaj qeverie se projekti i “Zajednicës” përfundimisht ka rënë poshtë. Gjithashtu, dëshirojmë t’i kujtojmë se qytetarët e Kosovës e kanë kuptuar shkeljen që është bërë me këto marrëveshje dhe se ata nga kjo Qeveri presin vetëm një gjë – largimin e menjëhershme. Çdo përpjekje për të mos u përballur me përgjegjësinë do të çojë në eskalim të situatës, deri në rrëzimin e kësaj qeverie”, theksoi në fund Driton Çaushi”, ka kumtuar Vetëvendosje.

PËRGJIGJU

Please enter your comment!
Please enter your name here