Tërmet në Nepal,bilanci 1000 të vdekur (video)

0

Ka shkuar në mbi 1 mijë numri i personave që kanë humbur jetën nga tërmeti i fuqishëm që goditi Nepalin në orët e para të së shtunës.

Epiqendra e tërmetit ka qenë në një zonë 77 kilometra në veri-perëndim të kryeqytetit Katmandu. Në zonën në fjalë, pallate të shumta janë rrafshuar duke zënë poshtë banorët.

Një ministër nepalez ka deklaruar se dëmet e shkaktuara janë masive dhe situata më emergjente se kurrë, ndaj dhe ka kërkuar ndihmë nga agjencitë ndërkombëtare.
“Na duhet mbështetje nga agjencitë e ndryshme ndërkombëtare, që kanë aftësitë dhe pajisjet e duhura për t’u përballur me këtë lloj emergjence”, tha ministri i Informacionit, Minendra Rijal.
Thirrjes së autoriteteve nepaleze iu përgjigjën të parat Shtetet e Bashkuara. Uashingtoni njoftoi dërgimin e menjëhershëm të një ekipi emergjencash dhe një shumë prej 1 milion dollarësh përmes USAID-it për të siguruar nevojat më urgjente.
Edhe Britania e Madhe dhe Franca deklaruan se do të ‘bëjnë gjithçka për të ndihmuar Nepalin’ në këtë situatë të jashtëzakonshme.
Tërmeti i fuqishëm shkatërroi edhe kullën Dharahara në Katmandu, ku banorët dolën nëpër rrugë, ndërsa të plagosurit u dërguan në spitalin kryesor. Rrjetet e telefonisë së lëvizshme kanë dalë nga funksioni.
“Ishte e tmerrshme. Toka lëvizte e gjitha. Po pres për trajtim këtu në spital, por pjesëtarët e stafit janë të mbytur nga puna. Këtu është plot me të plagosur”, ka qenë dëshmia e një banoreje.
Ndërkohë, lëkundjet sizmike janë ndjerë edhe në Nju Delhi dhe qytete të tjera në veri të Indisë, si dhe në Pakistan, Tibet e Bangladhesh ku janë regjistruar edhe viktima, por ende nuk dihet me saktësi se sa.
Kryeministri indian Narendra Modi ka mbledhur ministrat e kabinetit të tij për të diskutuar mbi situatën, ndërsa ai pakistanez Naëaz Sharif ka bërë thirrje për ndihmë në mbështetje të autoriteteve nepaleze.

 

PËRGJIGJU

Please enter your comment!
Please enter your name here