Mërgata shqiptare në Zvicër reagon për “lojërat” e Byrosë Kosovare të Sigurimeve” me kartonin e gjelbërtë

0
Kuvendi i Shqiptarëve të Zvicrës, nëpërmjet një komunikate për media ka reaguar për vendimin e Byrosë Kosovare të Sigurimeve për moszbritjen e çmimit të polisës për mërgimtarët.
“Javën e kaluar Byroja Kosovare e Sigurimeve, ka dështuar ta aprovojë propozimin për uljen e tarifës së sigurimit kufitarë për 50 për qind, për bashkatdhetarët. Ky vendim, krejtësisht i padrejtë dhe diskriminues për bashkatdhetarët, është i papranueshëm”, është thënë në komunikatën e dërguar nga Kuvendi i Shqiptarëve të Zvicrës, ka raportuar “albiinfo.ch”.
Më tej, Kuvendi i Shqiptarëve të Zvicrës ka potencuar se kompanitë e sigurimeve frikësohen nga vendimi për përgjysmim të çmimit, pasi që gjatë gjithë këtyre viteve, ato kanë pasuar vetëm fitime të pastra. “Faktikisht, kompanitë e sigurimeve, nga polisa kufitare gjatë vitit të kaluar, kanë realizuar të hyra mbi 14 milionë euro. Kjo iniciativë për zbritjen e kësaj tarife ishte proklamuar nga autoritetet më të larta në vend, si Qeveria, Parlamenti si dhe Banka Qendrore e Kosovës. Duke u konsideruar si e padrejtë shuma që bashkatdhetarët me vite kanë paguar. Lajmi se do të zbritet 50 për qind polisa e sigurimit për bashkatdhetarët, që do të thotë nga 40 euro do të bie në 20 euro dhe për 15 ditë, 15 euro, mbetet vetëm si deklaratë për media”, është thënë në këtë reagim.
Kuvendi i Shqiptarëve të Zvicrës ka vlerësuar se deklaratat e Komisionit për Buxhet dhe Financa, kinse Komisioni paska vendosur që në shtator të nisin ndryshimin e këtij ligji, ku kompetencat për të vendosur për tarifa nuk do t’i ketë më Asambleja e Byrosë Kosovare të Sigurimeve, tregon edhe njëherë fakti, se sa papërgjegjshëm sillen këto institucione karshi mërgimtarëve, të cilët janë qytetarë të Republikës së Kosovës dhe kontribuuesit më të mëdhenj të ekonomisë dhe zhvillimit të Kosovës. “Kuvendi i Shqiptarëve të Zvicrës, kërkon në mënyrë të prerë, që institucionet përgjegjëse të Kosovës të tregojnë seriozitet dhe vullnet politik, që në njërën anë të ulen tarifat në 50 për qind, para se të fillojë ardhja e mërgimtareve për pushime verore në Kosovë, siç është premtuar, në anën tjetër të punohet në mënyrë intensive me të gjithë partnerët relevant, për arritjen e marrëveshjes për kartonin e gjelbër. Institucionet e Kosovës, e kanë për obligim ligjor dhe moral që të mos dëmtohen bashkatdhetarët nga politika monopoliste e grupeve të interesave”, është thënë komunikatën e Kuvendit të Shqiptarëve të Zvicrës./albinfo.ch

PËRGJIGJU

Please enter your comment!
Please enter your name here