A ka djalë nëne ta heqë këtë shtyllë në mes të një fushe futbolli në Mitrovicë?!

0

Bardhec Seferi, një ish-emër i njohur i futbollit kosovar, është sprovuar së fundi që të bëjë atë që bëri vite më parë Edi Rama, ku me një sëpatë në dorë shkoi dhe e hoqi vetë një shtyllë te gjendur në mes të rrugës. Por shtylla që hoqi Rama ishte e Telekomit dhe jo një shtyllë tensioni që mund të të lë shakull në tokë. Ndaj, Bardhec Seferi nuk ka ndërmend të luajë me jetën, edhe pse zyrtarë të KEDS-it ja kërkojnë këtë.
Po si qëndron konkretisht puna?
Shtylla ndodhet në mes të fushës së futbollit të klubit të futbollit ‘Bardhi’ në Mitrovicë.
Qyteti i Mitrovicës pas luftës ka pasur 4 fusha- stadiume të futbollit: ‘Adem Jashari’, ‘Riza Lushta’, si dhe fushat stërvitore ‘Riza Lushta’ e ajo e ‘Jusës’.
‘Riza Lushta’ dhe ‘Jusa’ që ka qenë në lagjen ‘Bair’, janë tretur nga qeverisjet e shkuara komunale të Mitrovicës, ku njëri është kthyer në treg të gjelbër të qytetit, ndërsa tjetri është kthyer në rrugë.
Pas tretjes së këtyre stadiumeve apo fushave stërvitore, grupmoshave të reja të futbollit të mitrovicës u janë vështirësuar kushtet për stërvitje dhe zhvillim të ndeshjeve.
Në anën tjetër, klubi i futbollit ‘Bardhi’ nga fshati Zhabarë i Mitrovicës që garon në kategorinë e “juniorëve” të futbollit të Kosovës, e ka rregulluar fushën e vet.
Ky klub që është pjesë e Akademisë së Futbollit ‘Bardhi’, deri më tani garat i ka zhvilluar në atadiumin “Adem Jashari” dhe në fushën e madhe me bar sintetik të Akademisë së Futbollit ‘Australia’
Por zhvillimi i lojërave nëpër stadium të tjera, ka paraqitur probleme financiare për KF ‘Bardhi’.
Bardhec Seferit, ish-futbollistit i shquar kosovar i cili drejton këtë Akademi, ka thënë ndërtimi i fushës së madhe ka qenë i domosdoshëm, gjë që u bë realitet, por tani problem është një shtyllë tensioni në mes të saj që u rri mbi kokë fëmijëve.
”Fusha është rregulluar e gjitha, por brengosës është prania e një shtylle elektrike e tensionit të lartë që paraqet rrezik permanent për vijuesit e shkollës së futbollit”, ka thënë Seferi, ish-futbollist i Trepçës.
Seferi thotë se disa herë i ka bërë kërkesë ish-KEK-ut dhe tani edhe KEDS-it, por asnjëherë nuk ka marrë përgjigje pozitive për largimin e shtyllës nga fusha e blertë.
”Kam kërkuar katër herë nga KEK-u dhe KEDS-i me e largu atë shtyllë nga aty, por zyrtarët e tyre kanë thënë se nuk mund ta largojnë sepse nuk është punë e tyre. Në kërkesën time të fundit drejtuar zyrtarëve të KEDS-it, më kanë thënë se atë punë duhet ta kryej vetë, gjë që është e papranueshme për mua, sepse unë nuk kam si e prek tensionin e lartë”, ka thënë Seferi
Fusha e madhe me bar natyral është e përmasave 100-55 m, ndërtimi i saj deri më tani ka kushtuar mbi 50 mijë euro, mjete këto të cilat Seferi i ka dhënë nga xhepi i vet, sepse siç thotë ai nuk ka pasur kurrfarë përkrahje nga institucionet.
”Nuk e kam pas ndihmën e askujt, e as që më ka pyetur dikush se a kam nevojë për ndihmë, por është dashtë kafshatën e gojës me e nda për ndërtimin e kësaj fushe, vetëm që këta të rijnë t’i kenë kushtet sa më të mira për zhvillimin e garave”, ka theksuar ish-futbollisti i Kombëtares së Kosovës.
Ai vuri në pah ekzistimin e dy fushave të mëhershme të futbollit në Mitrovicë, si ajo e lagjes “Bair” dhe fusha ndihmëse e stadiumit ‘Riza Lushta’, të cilat nuk janë më, sepse njëra është uzurpuar dhe kthyer në rrugë, ndërsa tjetra është shndërrua në treg të gjelbër.
”Sikur mos t’u shkatërronin ato fusha, nuk kishim pas nevojë me i bërë gjithë këto investime, ngase kishte pasur hapësira të mjaftueshme për zhvillimin e garave”, ka thënë Seferi.
Ndërtimin e fushës së madhe e kanë mirëpritur shumë mirë futbollistët e kategorisë së “juniorëve”.
”Ka qenë nevojë e madhe e klubit për ndërtimin e fushës, sepse ne ushtrimet i zhvillonim në fusha të vogla dhe kur dilnim në fushë të madhe ishte e vështirë të realizohej koncepti i lojës. Jemi lodhur duke luajtur nëpër fusha të ndryshme, e ndërtimin i fushës së te e të madhe na bën të shpresojmë për rezultatet shumë më të mira”, ka nënvizuar Seferi së bashku me lojtarët. “Tani kemi përparësi të dukshme sepse stërvitjet dhe takimet i zhvillojmë në stadiumin tone. Në kampionat kemi qenë mjaft të suksesshëm, por shpresoj se fusha do t’i dyfishojë rezultatet”, ka thënë qendërmbrojtësi i ‘KF Bardhi’ Alberi Kajtazi.
Por ja që shtylla e mbetur aty, po është një sfidë e madhe dhe e vështirë, sepse nuk ka të bëjë me sportin, por me institucionet, me shtetin, me burokracitë e ndryshme që bëhen pengesë e njerëzve që kanë pasione dhe duan të ndërtojnë diçka të mirë për shoqërinë.
Sepse, ja rezultati: i kontaktuar për këtë problem, një zyrtar i distriktit të KEDS-it në Mitrovicë, nuk kanë pranuar të prononcohet me arsyetim se e kanë të ndaluar të flasin për media. /tesheshi.com/

PËRGJIGJU

Please enter your comment!
Please enter your name here